Frábær árangur hjá Gunnari

Já, Gunnar gerði sér lítið fyrir og vann til gullverðlauna á Opna meistaramótinu í Brasilísku Jiu Jitsu (BJJ) á Hawaii í nótt. Þátttakendur á mótinu voru í kringum 150 en því var skipt upp í þrjú styrkleikastig (novice, intermediate og advance) og tók Gunnar þátt í því erfiðasta (advance) en hann keppti í -176 punda flokki (ca. -80kg). Flokkur Gunnars var ekki mjög fjölmennur en hann sigraði þó tvo erfiða andstæðinga í úrslitum og tryggði sér gullverðlaunin en sá sem Gunnar sigraði í fyrstu glímunni var m.a. talinn sigurstranglegastur í flokknum og hafnaði loks í öðru sæti eftir úrslitarimmu við annan andstæðing sem Gunnar sigraði einnig á mótinu. Sannarlega frábær árangur hjá Gunnari en rétt er að rifjað upp að Gunnar sigraði Opna írska meistaramótið í BJJ í október á síðasta ári, bæði í sínum þyngdarflokki og í opnum flokki. Ekki var keppt í opnum flokki á mótinu á Hawaii í nótt. Gunnar er nú á leið heim til Íslands og er væntanlegur á miðvikudagsmorgun.

Vann til gullverðlauna á Hawaii

Athugasemdir

[Didda, 2.6.2008 kl. 14:28]

Glæsilegur árangur 

[Bjarni H. (IP-tala skráð) 3.6.2008 kl. 02:17]

Aldeilis frábær árangur hjá frænda! Glæsilegt!

[Sindri Njáll (IP-tala skráð) 3.6.2008 kl. 16:49]

Glæsilegur árangur!

Hefur Gunnar ekkert velt því fyrir sér að reyna að komast að í raunveruleikaseríuni Ultimate Fighter? 

[Halli Nelson, 4.6.2008 kl. 00:56]

Það gæti auðvitað verið gaman en sennilega ekki tímabært. Auk þess þurfa keppendur þar að vera orðnir 21 árs og með atvinnuleyfi í Bandaríkjunum. Gunnar er aðeins 19 ára í dag.